Ինչպես է ծնվում գիրքը
"Ինչպես է ծնվում գիրքը" նախագիծը հաղթող է ճանաչվել "Ռուսալ Արմենալ" ՓԲԸ-ի և ՄԱԶԾ-ի կողմից 2008 թվականի սեպտեմբերին հայտարարված "10 լավագույն ծրագիր" մրցույթում և մեկնարկել է 2009 թվականի հունվարից:
Մրցույթին մասնակցելու հայտ էին ներկայացրել Երևանի 27 դպրոցներ, որոնց թվում և "Օհանյան" կրթահամալիրը, որը ներկայացավ "Ինչպես է ծնվում գիրքը" նախագծով:
Ծրագրի առաջին փուլում աշակերտներն ուսումնասիրում էին բնական գիտությունները, համացանցից և համապատասխան գրականությունից ձեռք բերում տեսական գիտելիքներ` մետաղների ֆիզիկական և քիմիական հատկությունների մասին:
Ծրագրի երկրորդ փուլը նշանավորվեց Մաքուր երկաթի և Մոլիբդենի
գործարան կատարած այցով:Անչափ հետաքրքիր այս նախագիծը հետապնդում էր ևս մեկ այլ նպատակ. հայ մարդուց "անժամկետ" հեռացած գրքի` հայ մարդու անփոխարինելի բարեկամի նկատմամբ հետաքրքրության բարձրացմանը:
Եվս մեկ կարևոր հանգամանք. բնական գիտությունների և այդ գիտությունները գործնականում կիրառող արդյունաբերության նկատմամբ սեր և հետաքրքրություն արթնացնելու նպատակով կրթահամալիրի սաները որոշեցին գիրք հրատարակել: Որոշմանը հետևեց նրանց արկածներով լի պրպտումները կամ այլ կերպ ասած` առաջին արդյունաբերական ճամփորդությունը դեպի Երևանի Մաքուր երկաթի, ապա Մոլիբդենի և Ալյումինի գործարանները:
Աշակերտների տեսածը հրաշքի է նման, որին ականատես եղան Մոլիբդենի գործարանում, դա արտադրական ողջ համակարգի այն հատվածն էր, ուր բարձր ջերմաստիճանում հալեցրած երկաթը հսկայական կաթսաներից լցվում էր ձևակաղապարների մեջ: Շողարձակող ու բոցկլտացող հեղուկը ընդհանուր մթության մեջ էր թողնում արտադրամասի մնացած հատվածը:
Իսկ բանվորները… Մեզ կախարդական թվացող այդ հեղուկը նրանց համար ասես սովորական մի փորձանյութ լիներ, որի հետ "խաղում էին", լցնում, դատարկում, խառնում, սառեցնում…
Որքան գեղեցիկ է այն, ինչ հաճախ նաև սարսափելի է…
Մարմինս սարսռում է հրահեղուկի տեսքից, ու թվում է` այն թափվում է ոչ այլուր, քան իրական անդրաշխարհ…
Անսովոր ջերմությունից ու փայլից կկոցում ես աչքերդ ու ապրում զարմանալի, անհասկանալի մի հիացում … Հրաշք է … Ահա թե ինչպիսին կարող է լինել հրաբուխը, որի գայթակղիչ գեղեցկությունը դիտողին ստիպում է քարանալ ու տիեզերքի ողջ անսահմանությունն ամբարել մի ակնթարթում…
"Ինչե˜ր տեսանք և սովորեցինք այսօր"-խոստովանում էին աշակերտները:
Աշակերտների համար չափազանց տպավորիչ էին ԵՊՀ քիմիայի և ֆիզիկայի լաբորատորիայում կատարած "Փարավոնի օձ", "Չայրվող թաշկինակ", "Քիմիական հրաբուխ", "Ջրային անտառ" փորձերը:
Մեր ձեռք բերած տեսական գիտելիքների մասին գիրք տպագրելու համար պիտի ծանոթանայինք հրատարակչական գործին: Դրանում մեզ սիրով աջակցեց "Ասողիկ" հրատարակչությունը: Աշակերտների համար տպագրատուն այցելելը և գրքի արարումը տեսնելը իրականացված երազանք է այսուհետ:Գունաբաժանման և գրքի ստեղծման մյուս աշխատանքները ևս դիտեցին: Զարմացան, երբ իմացան, որ բոլոր երանգներն ու նրբերանգները արվում էին չորս հիմնական գայթակղիչ գույներով` կարմիր, կապույտ, սև և դեղին:
Տպավորությունն ու հավաքած նյութերը որքան ուզես: Մնում էր ավարտին հասցնել իրենց սեփական գրքի արարումը:
"Մի գրքի պատմություն" գիրքը օհանյանցիների մտքի, երևակայության ու ուսումնասիրությունների արգասիքն է, որի համար նրանք խրախուսանքի արժանացան` ձեռք բերելով ֆիզիկայի և քիմիայի լաբորատորիաներ, ինչի համար խորին շնոհակալություն են հայտնում մրցույթի կազմակերպիչ-հովանավորներին:
